看百变星君剧本学粤语
李泽星：边有心情呀?
姜司教授：手术总括嚟讲系好成功。个样亦回复返同以前差唔多嘞。
李泽星：面型唔掂吖嘛。
阿达：国字口面啫，好有性格呀。
李泽星：噉会唔会国过栊呀?
阿达：冇乜嘢呀。
李泽星：你望望我先讲吖。
阿达：望乜嘢呀?我都未食面。
李泽星：嗱，大家天地良心嘞，噉都过到骨?
阿达：哎吖，水货嚟架嘛!将就吓啰。
李泽星：噉我自杀嘞。
阿达：喂喂喂!噉又唔使咁偏激。喂!教授呀，噉又的而且确过唔到骨嘅!拍硬档帮帮手再搞搞添啦。
姜司教授：呣。
姜司教授：你睇，四正晒。
阿达：同以前一模一样呀。
李泽星：多谢晒你呀教授。
姜司教授：应该嘅。
李泽星：但系我觉得有啲长短手噉样。
姜司教授：系人都有长短手架啦。
李泽星：但系都冇话差咁远架，讲真。噉点先?
阿达：水货嚟架嘛。将就吓啦!
李泽星：噉我自杀喇!
阿达(忟)：教授，家吓你系咪玩我哋两仔爷呀?咁短你都够胆交货。你系咪揾笨呀家吓?
姜司教授：冷静啲!冷静啲!
阿达：冷静啲?点样冷静啲先?
姜司教授：信多我一次，信多我一次。
阿达：信多你一次吓哗?
姜司教授：你真系好彩，呢个月医院掉咗几百对手落垃圾桶。我终于揾咗一双最完美嘅畀你。
阿达：你试吓用力睇吓。
李泽星：得嘞!
阿达：得嘞吓哗?
李泽星：得呀!(发现自己冇脚，晕咗)
姜司教授：对唔住，呢个月掉嘅净系得手咋。
阿达：水货嚟啫，将就吓啰。
(草坪)
姜司教授：左手!右脚!我都话得架啦!(李泽星有齐晒手同埋脚)Yeah!
李泽星：Yeah!
阿达：Yeah! 好嘢!好嘢!恭喜晒，教授!恭喜晒!终于成功咯!
姜司教授：我都话得架啦!系咪呀?恭喜!停呀!
李泽星：我停唔到呀!仆你个街呀!
(黄昏)
阿达：佢重要发到几时呀?
姜司教授：睇嚟，要冇电先至会停嘞。
阿达：停咗喇!冇电喇!冇电喇!
阿达(扶起李泽星)：嚟。
姜司教授：啲电子器官开头未适应呢，失控救难免架嘞。迟啲就冇事架嘞。(扐出一啲电芯)重有呀，你以后餐餐食电芯。千圻唔好湿身。如果唔系，全身就会瘫痪架嘞。
李泽星：急尿!
姜司教授：随便。
阿达：喂!净系食电芯?
李泽星：哗!(揸住一条水喉)What is this?
姜司教授：呢个系排尿器。用完记得闩返佢。
(阿达笑)
李泽星：你都揾个似样少少架。
阿达：喂!噉屙屎点呀?
姜司教授：都系呢度啰。
李泽星：你?(晕)
姜司教授：唔好晕呀!(扶起李泽星)我重差一块电子晶片未输入你个脑里便。如果输埋落去嘅话，你嘅电子器官模仿功能就会启动。到时候就可以千变万化。喺理论上可以变成任何嘢。
李泽星：我净系想呢度变返同以前一样。
姜司教授：都得。
李泽星：噉你重唔搞搞佢?
姜司教授：不过我重未发明到。
李泽星：你?!啡你至得。(揾水喉啡姜司教授)
姜司教授：唔好呀!
阿达：啡佢!啡佢!
姜司教授：唔好呀!唔好呀!
画外音(姜司教授)：阿星，山口组喺度嘅势力好大，而且心狠手辣。万一富田知道你未死，一定会再嚟架。所以听日我会帮你举行一个假葬礼。而你就尽快离开呢度返香港，以后都唔好再返嚟。
(葬礼净得虫虫一个参加)
李泽星：当今世上居然会有人为我流眼泪，我会记住架!
(香港 两年后11时51分)
(滂沱大雨)
差人：喂!老友!老友!呢幢楼就嚟拆架嘞㖞，重未搬呀?
阿达：走架嘞……阿Sir，入去执埋啲嘢走架喇。
差人：好快啲走喇!
阿达(开门，开灯)：又畀雨淋湿哩?
李泽星：掂亲水都梗晒轪，啲手手脚脚唔知挞咗去边。我都唔想做人咯。
*阿达：咪讲埋啲衰嘢啦，擳啲机油咪冇事咯。
李泽星：做乜拗到我噉啫?
阿达：攞只手指嚟，噉喇。(用李泽星嘅手指塞住鼻哥竉)
李泽星：喂!唔好玩啦!我好急尿呀，你帮我放放水先啦。
阿达：好啦!好啦!
李泽星：我攞咗出嚟喇，畀你踩住咗喺下便呀。
阿达：喂!唔好意思㖞吓。做乜换咗个花洒?
李泽星：旧嗰个塞咗，屙亲都喺耳仔出，有咩办法唔换呀?
阿达：冇嘅?咪一样耳仔出?一样塞住?
李泽星：系?喂，你帮我吹返通佢吖唔该。
*阿达：等一阵你得闲自己吹啦。哎，咪屙住。嗱，屙啦!(中招)
(两仔爷食饭)
*阿达：食饭!食饭!老窦今日畀人炒鱿鱼呀。嗱，呢处过两日就拆架嘞!到时我哋早啲去公园霸两张靓凳。听讲话呢轮公园呢出现咗变态色魔，专门捉你呢廷噉嘅后生仔嚟通柜呀。嚟呀，整啲喼汁佢。
李泽星(食电芯)：日日食呢啲，真系想转吓口味。
阿达：好呀，听日同你买只环保电芯呀。
李泽星：噉不如买两樽滴露呀，我同你一人一樽猜咗佢，一了百了算喇!
(门钟响，王小虎嚟揾李泽星)
李泽星：小虎?乜咁错荡呀?
王小虎：星，我帮你揾咗份工。
李泽星：有噉嘅事?
王小虎：系做生物教师。你跟住呢个地址去间学校度。八点钟，我已经帮你安排好晒架喇。有万几文一个月架。
李泽星：小虎，我以前噉对你，你重对我咁好。我……
王小虎：傻啦，以前啲嘢唔好再提喇。大家都系成年人。
李泽星：小虎!
王小虎：畀啲心机做啦。
(第二日)
(李泽星返工)
的士司机：喂，找钱呀。
李泽星：差五毫子。
的'士司机：啊?
李泽星：重差五毫子。
的士司机：你喺度教书架?
李泽星：好话嘞。
的士司机：畀多一文你呀，等你一阵间有钱打电话报警呀。
李泽星：早晨!我系新嚟嘅生物教员。
生番(标晒冷汗)：我有不祥预感呀，实在太平静嘞!
李泽星：系!环境相当唔错。
生番：你太疏忽嘞。呢度号称：全港教师坟墓。教员受伤，半身不遂嘅比例系百分之五十七。每日返学都唔可以太疏忽嘅。
李泽星：其实我以前都系一个无恶不作嘅学生。卑鄙系我嘅花名，无耻系我嘅真名。正所谓咩未见过呀?
生番：蠢材!我以前嘅绰号系地狱之王教员呀。而家喺度，系条可怜虫咋!
(上堂嘅铃声)
(李泽星走入学校)
学生甲：阿Sir，早晨!
李泽星：早晨!
学生乙：阿Sir，早晨!
李泽星：乖女!
学生乙：咦你新嚟架?
李泽星：系吖。
学生乙：不如我带你去教务处呀。
李泽星：好呀。
学生乙：呢度就系嘞。
李泽星：吓?唔系啩?
学生乙：拜拜!
生番(担遮)：小心!(啲学生将啲水倒落嚟)
(生番同李泽星东逃西窜)
李泽星：咦，有啲料到㖞吓。睇嚟呢度安全啲。
生番：有时越安全就越危险呀。(李泽星不幸畀扇门碛到)
李泽星：你话喺度教书有百分之五十七重伤。噉重有嗰四十三点呀?
生番：有百分之二十三死亡，有百分之十一神经失常，只有百分之九可以忍辱偷生。
(走出一个学生)
李泽星：哗，阿Sir，乜你又搞成噉呀?
长毛：阿Sir!
生番：唔使惊!佢系长毛，学生中嘅二五仔嚟嘅。专系嚟报料架咋。
李泽星：哦，二五仔唔使着裤嘅。
长毛：就系畀人识穿咗先要除裤。佢哋话，今日有个新嚟嘅阿Sir，要佢死无葬身之地呀。嗰个唔系你吓哗?
李泽星：哼!噉真系要见识吓。
李泽星(走入班房，将把刀插喺台上面吓吓班学生先)：我讲你听，我以前都系一个狼心狗肺行同禽兽嘅。
某同学(举手)：阿Sir!
李泽星：咩事呀?
某同学：请问你咩血型架?
(李泽星抬头望，一个网从天而降罩住自己)
(李泽星畀班同学搞掂)
(长毛同生番行天主教礼)
(校长办公室)
校长：阿邓生，今年我哋圣贵族国际学校嘅盈利呢比旧年上升百分之一百。我身为校长嘅，都可以向校董会有所交代啦。
邓生：哎，出年我哋每级加多两班，学费杂费再加百分之五十。
校长：我哋万七文一个月架嘞噃。
邓生：哎，呢班学生边系读书架?佢哋啲老窦冚棒唥都大把钱嘅。求祈有学校肯收佢哋，包佢哋去到美国啲野鸡学校读书呀，多多钱都畀呀。
校长：噉又系。
邓生：重有呀，出年如果盈利多啲呀。我申请上市呀。
校长：噉呀?邓生，高见，高见吓!
邓生个仔(开门入嚟)：喂!老窦呀，有个瘌痢畀个学生打到仆街吖。
校长：有啲噉嘅事?
邓生：打开门做生意系噉架喇。
邓生个仔(坐低)：系咯，学生系我哋啲客嚟架嘛。舞厅啲舞小姐晚晚都要笑面迎人架啦。
校长：但系舞小姐唔使畀人打架㖞。
邓生：但系要畀人扑㖞，扑咪即系打?!
邓生个仔：系啰，所以你以后当自己系舞小姐喇。
校长：我唔做舞小姐，我系妈咪呀。我系妈咪呀。
邓生：妈咪!
(李泽星畀啲学生猛咁糟质)
某同学：你唔识字架?狗与老鼠不得内进呀!耷湿佢!
(Male Staff Lavatory：“美男子不得內進”)
李泽星(照镜)：又唔入得!
(李泽星用花洒浇花，畀啲学生发现)
(啲学生拖住李泽星嘅花洒四围走)
李泽星：顶唔顺!顶唔顺!断喇!
李泽星(揽住校长)：救命呀校长!救命呀!
校长：畀心机做啦!慢慢你就惯架嘞。
(李泽星畀绑喺校门上)
(昔日嘅四眼钢牙妹经过，现时嘅佢已经变得婷婷玉立)
李泽星：Hello!
虫虫：Hello!
李泽星：我未死架。
虫虫：阿叔一早话咗畀我知嘞。
李泽星：Hello! Hello!
虫虫：你就系今日新嚟嗰个先生嗱，吓嘛?
李泽星：系吖。Hello!
虫虫：使唔使帮手呀?
李泽星：唔使!我几好呀!
虫虫：噉你教成点呀?
李泽星：So far so good嘅。
虫虫：你系咪教园艺架?
李泽星：吓?
虫虫：呢个花洒呢。
李泽星：唔好，唔好，唔好，唔好，小心睇住!睇嗱喳呀!你知喇，花洒嘅嘢。吓哗?
虫虫：OK.
校董个仔(开住架跑车)：虫虫!
虫虫：有人嚟接我呀!走先嘞。
李泽星：吓哗?
虫虫：拜拜!
李泽星：拜拜!
长毛：哗!阿Sir，乜搞成噉呀?
李泽星：So far so good噉啦。
长毛：咁好呀?噉就继续啦。不过我系你就死咗佢嘞。
李泽星：就照你说话做啦。
(李泽星屋企)
(李泽星企图自杀)
李泽星(饮滴露)：唔系啩?喺呢度流返出嚟?
李泽星(摸电)：电咗重精神!死嘞!
李泽星(谂住跳楼)：有本事就跳楼都唔好畀我死!
(李泽星鼓起勇气跳落楼，喺千钧一发之际姜司教授将一块晶片抌入李泽星嘅口)
姜司教授(非常兴奋)：终于成功喇!成功喇!
姜司教授：你知唔知道?嗰块超级霹雳无敌嘅晶片我已经发明咗。就喺千钧一发嘅时候我将佢抌咗入你个口度。你而家已经变成一个七十二变嘅超人。可以维护世界和平。
李泽星：咩话?
姜司教授：可以维护世界和平!
阿达：可以咩话?
姜司教授：可以维护世界和平!!
(阿达起身)
姜司教授：你去边呀?
阿达：我去歼灭银河系五大行星嘅侵略者。
姜司教授：你呢?又去边呀?
李泽星：我冇咁巴闭。我想返去自杀。
姜司教授：你听我讲埋先㖞。你虽然成身都系水货呀，但系只要有咗嗰块晶片啫，模仿器就会自动启动。到时候能源就会源源不绝，你真系可以变成其他嘢架㖞。
李泽星：噉变个电饭煲得唔得呀?
姜司教授：得!只要你想就得嘞。
(李泽星变成电饭煲)
李泽星：唔好玩啦教授!重细咩你?
姜司教授：你自己照吓镜喇。
李泽星(吃惊)：啊?!点会噉架?
姜司教授：信喇嘛?想变返人就谂吓自己。
阿达：教授，呢个唔系我个仔吓哗?变返原形畀佢睇。
阿达：有啲噉嘅事嘅真系?
(李泽星含住一嚿饭)
阿达：唔好嘥!唔好嘥呀!(问教授)教授呀，乜净系得饭嘅咩?变啲餸出嚟得嘛?
(李泽星变成一支西人牙膏)
姜司教授：变嘞!
阿达：变嘞!变嘞!衰仔吖!你变成一碌牙膏噉托杉咩?
李泽星：啱啱谂起刷牙就搞成噉喇。
阿达：唔好讲咁多喇，变条金条出嚟先讲呀。
姜司教授：哎，对唔住!目前至叻只可以变牙膏。
阿达、李泽星：啊!
姜司教授：开头唔惯就唔可以变咁多嘢架喇。不过唔紧要㖞，你唞返一阵，就可以变返自己架嘞啰㖞。我费咗一生嘅精力，将黄老太家庭电器用品大全输咗入你嘅电脑入便。跟住落嚟呢，你就可以变好多好多有趣嘅嘢架嘞。
李泽星：黄老太家庭电器用品大全有咩架势嘢呀?
阿达(刷牙)：系咯。系咯。
姜司教授：有呀!有好多都好架势架。就好似有个马桶噉，又新款，又……
李泽星：得喇，唔好再讲嘞。
李泽星：呢支西人牙膏嚟㖞，你黑人用返黑人牙膏好㖞。
FBI：我都系西人嚟架。
李泽星：你系西黑人，坐返低啦!
FBI：吆!
姜返司教授(介绍)：呢位呢就系美国嚟嘅FBI Mr. Black Stone。佢希望今次呢，就可以带你返去美国指证山口组嘅富田嘅。
阿达：唔好搞嘞!上次未做已经炸到散晒，死梗架。
姜司教授：你都搞成噉嘞，正所谓人唔似人，鬼唔似鬼噉。重有咩可以担心至得架?
李泽星：啊!最衰都系你呀，好嘢唔见你益吓我。整啲家庭用品畀我叹吓，搞到我而家噉嘅样。你话畀虫虫见到几丢架得架。
姜司教授：噉你又唔使担心㖞。今晚校董个仔吖已经约咗虫虫上山顶餐厅相睇㖞。
李泽星：咩话?阿爸，即刻擳晒我啲牙膏出嚟，等我膏尽人亡而死。
阿达：死咩死?啊?你问过阿爸未呀?家吓你几咁重要你知唔知呀?全世界净系得你一个可以变成一支西人牙膏。你话畀虫虫知道佢以后可以免费日日噉刷牙，重唔仆倒噉埋嚟呀?将来你重要维护世界和平。而家竟然同我话要死?
李泽星：噉我而家应该点呀?
阿达：你自己话呢?
(好大支西人牙膏招摇过市)
(山顶)
电话另一头：你而家喺边嗱?等紧你开饭架。
魔术师(讲电话)：我而家喺山顶呀，Honey。
电话另一头：噉重唔返嚟?
魔术师：我好快返嚟架嘞。(西人牙膏突然出现喺面前)见到支牙膏呀。
电话另一头：咩牙膏话?
魔术师：好大支西人牙膏呀!
(山顶餐厅)
邓太：饮杯!我哋阿尊呢成日话阿姜小姐你又大方又靓架。
虫虫：佢笑我之嘛!几年之前呢佢重叫我做四眼钢牙妹架。
邓太：噉就真系女大十八变啰。阿尊老窦呵?
邓生：入咗我哋邓家门，着衫就要密实啲。我哋家规好严架。
邓太：乜你讲嘢咁直接架?吓亲啲细路女呀。唔好意思呀!唔好意思!
虫虫：我去去洗手间先。
邓生个仔：好呀。
虫虫：唔该。
邓太(哦邓生)：系咪呢?系咪呢?人哋惊咗你喇!
(李泽星一身魔术师打扮嚟到山顶餐厅)
侍应生：喂!后便入呀。
李泽星：啊?后便入?
侍应生：喂!唔系我后便呀!后台吖!
李泽星：点解呀?
侍应生：你变魔术吖嘛。
李泽星：我揾人架。
侍应生：唔好意思呀，随便呀。唔系我呢度呀。
(李泽星见到虫虫走入厕所)
(李泽星伸出两只眼偷睇女厕，点知对眼掉咗喺地下，重畀人踩咗脚添)
清洁阿婶：喂!睇路呀!
李泽星：对唔住!
清洁阿婶：哗!睩到只眼咁大，想及嘢呀?死飞仔!
(李泽星入女厕)
虫虫：啊!
李泽星：系我呀。
虫虫：你入嚟女厕做咩呀?
李泽星：我专登赶嚟有啲嘢同你讲。
虫虫：有咩你讲呀。
李泽星：我已经同以前唔同晒。
虫虫：我见到，斑马吖嘛。
李泽星：其实，系我由现在开始，要堂堂正正做一个人。
虫虫：堂堂正正就唔会入嚟女厕啦。
李泽星：我冇台呀。
虫虫：我朋友喺出面等紧我。
李泽星：你系咪嚟相睇架?
虫虫：都唔关你事吖。
李泽星：未必嘅，如果你有少少少少咁多钟意我嘅话。
虫虫：你凭乜嘢话我钟意你呀?
李泽星：凭你两年前喺我葬礼入便，你为我流过一滴充满爱意嘅眼泪。
虫虫：对唔住呀!我谂你误会咗呀。我喺屋企踩死只曱甴我都会喊到叭叭声架，OK?
李泽星：虫虫，我可以保证我而家绝对好过一只曱甴。(变咗成一只马桶)
李泽星：我都话同以前唔同咗架咯。
虫虫：原来阿叔研究人造器官真系成功咗呀?
李泽星：实在太成功嘞!
(邓太入嚟女厕解决问题)
*邓太：死嘞!死嘞!乜爆晒棚架?
虫虫：伯母，你冇事吖嘛?
邓太：冇，冇!我呢轮食得减肥药多呢，屙爆缸。只脚都软呀。(见到李泽星变嗰只马桶)哎吖，乜咁趣致呀?个屎塔搬咗出嚟嘅。
虫虫：系咯，系咯。
邓太：喂，你唔使理我呀!一阵间好臭吓架。噉你出去同佢哋倾吓偈吖，食吓嘢噉哩。乖!乖!
(出面)
邓生个仔：虫虫呀，不如我哋跳只舞呀。
虫虫：好呀。
邓太：话之佢吖!
李泽星：阿婶，你屙屎定屙尿呀?
邓太：梗系屙屎。
李泽星：屙住喺面盆先得嘛?
邓太：啊——
李泽星：啊——
(邓太畀弹出女厕)
邓生：咩事呀?
邓太：我畀个屎塔吓到弹咗出嚟吖。
邓生：你系咪擒晚打麻雀打到short咗呀?
邓太：真架。真架。
邓生：返埋位先啦，行啦。
邓太：哎吖!
邓生个仔：做咩呀?
邓太：我条底裤漏咗喺入便嗱。
邓生：行啦!唔觉架喇。
邓太：系咯，你返去坐先啦。
司仪：各位，现在由驰名中外嘅大魔术师Richard Billion为各位表演魔术杂技，现在开始。
李泽星：嗨!
Richard Billion：Hello!
李泽星：你识变咩魔术呀?
Richard Billion：我咩都识变。
李泽星：牙膏得唔得呀?
Richard Billion：牙膏?飞机大炮变得多嘞。(即时变咗几支牙膏)牙膏都系第一次呀。
邓太：畀多支我个仔吖，嚟吖，嚟吖。
(李泽星变成一支西人牙膏)
李泽星：咁大支牙膏你又晓唔晓变?
Richard Billion(手指指)：你真系吖!
李泽星：唔得哩?炒你鱿鱼!(变成一支镬铲，炒咗Richard Billion)
邓生个仔：好劲呀吓?
李泽星：多谢!多谢!细佬玩嘅绝对唔系特异功能，只系一啲掩眼法啫。而家想请一位现场观众出嚟帮吓手。(手指邓太)唔啱呢位阿婶哩?
邓太：我唔玩呢啲嘢嘅!
李泽星(手指邓生个仔)：呢位靓仔吖。
邓生个仔：我……
李泽星：冇胆就算嘞。
邓生个仔：我真系有胆架。
(李泽星借表演节目教训邓生个仔)
邓生：好嘢!好嘢!
(李泽星用鞭狂抽邓生个仔)
邓生：好戏!好戏!
邓太：好戏!明日之星呀!
邓生(醒觉)：嚟真架㖞。
*邓太：我顶你个制吖!吓?
(邓太畀劈开两半)
邓生：好嘢!
邓生：老婆!老婆!
(李泽星拉虫虫钻入炮桶)
(大炮弹两个人出去)
(李泽星揽住虫虫慢慢降落)
李泽星：惊就揽紧少少。呢啲嘢真系千祈唔好客气呀喂。
虫虫：好玩呀!我恨跳降落伞恨咗好耐架喇。啊!好开心呀!
李泽星：虫虫，你唔好噉啦!我好惊呀!
(落地)
虫虫：喂!你知唔知头先噉样整蛊人唔啱架?
李泽星：我噉做都系为咗你啫。我真系决心重新做人嘅哩。你试吓接受我吖，虫虫。
虫虫：点为之接受先?
李泽星：不外乎系拍吓拖呀结吓婚呀生吓仔嗰啲噉嘅嘢啫。你想做边样先?
虫虫：黐线。(掉头走)
虫虫(转身)：我会考虑吓同你拍拖先嘅。
李泽星(摆甫士)：Yeah!
(李泽星返工)
李泽星：由今日开始，冇人可以再对我大声半句。
的士佬(声大大)：冚家铲!重未畀钱呀!
李泽星(细细声)：唔好意思呀，嗰五毫子唔使找嘞。Sorry! Sorry!
(生番畀班学生绑喺校门上便)
生番：喂!快啲放我落嚟呀!快啲走呀!快啲去报警呀!班衰仔唔肯考试，喺里面作反呀!喂!快啲放我落嚟呀!喂!
(李泽星唔鬼睬佢)
(李泽星两三下手势就搞掂咗班马骝)
学生：走呀!快啲走呀!
李泽星(拍女生膊头)：好钟意玩水吓哗?
光头仔：嚟紧喇!
李泽星：有书唔好好哋读系要做人渣?!返入去考试!
(教室)
李泽星：全部揞住双眼拧转身!开始考试!光头仔第一个!
光头仔：我唔考!我唔考!
(考试开始)
李泽星：中国历史考试第一题。明太祖系边个?A、朱元璋 B、朱油糕 C、朱茵。
光头仔：朱茵。
李泽星：错!系朱元璋呀朱头炳!第二题，五胡乱华系边五胡?以下有一个答案系错嘅，要你拣出嚟吖嗱。匈奴，鲜卑，羯，羌，氐同埋香港。
光头仔：羌。
李泽星：你就真系够“羌”呀。耷呀!第三题，乾隆系雍正嘅边个?A、老窦 B、仔 C、大姨妈。
光头仔：我记得架!你等一阵，我记得架。我嗰堂有听书架。
李泽星：谂清楚呀你，威返次畀大家睇吓吖。
光头仔：系B，乾隆系雍正嘅仔。
李泽星：Yeah! 饮杯!光头仔乖呀!叻仔呀!叔叔抱!叔叔惜晒呀吓。
光头仔：我以后都会畀心机读书架。
其他同学：我都会呀。我都会呀。
(校长室)
校长：呢一个月嚟呢，多谢你将我哋全校最顽劣嘅学生教到乖晒。佢哋嘅成绩上升百分之三百呀。
李泽星：都系校长领导有方啫。
校长：李泽星先生，你真系我哋教育界嘅超级巨星呀。(拍掌)
李泽星(拍掌)：校长好嘢!校长好嘢!
校长：正因为噉呢，所以我哋学校实在唔能够屈就你有咁伟大嘅抱负同埋发展。所以，请你另谋高就。(喺个柜桶里面攞出一封信)
李泽星：校长不愧为校长。果然诙谐呀!
校长：我唔系讲笑架。你撬咗校董个仔嘅墙脚，我都保你唔住架。
李泽星：哦!噉啫吓哗?冇事嘅。约出嚟大家倾吓偈吖。
(会议室)
李泽星(鞠躬)：早晨!
邓生个仔：哎，废话少讲!你想保住而家份工嘅话呢，就即刻同我离开虫虫。
李泽星：等等!大家首先听我讲单紧要嘢先。
邓生：你讲啦。
李泽星：其实我系《未来战士》第三集。
邓生：咩话?
校长：重未拍架㖞套戏!
李泽星：而家拍呀。
邓生、邓生个仔、校长：啊!——
校长：《未来战士》第三集呀。《侏罗纪》第四集呀。《大白鲨》第五集呀。史匹堡咬人呀!我钟意呀!(三个人畀送上救护车)
虫虫：喂!点解佢哋会黐咗嘅?
李泽星：睇西片多得滞吖!冇计吖!港产片咁渣!但系校长临黐之前呢佢吩咐我，代住佢个位先。希望大家努力读书，发唔发达唔紧要架，但系起码要做一个受人尊重嘅人。
学生：Yeah!
虫虫：你而家都几受人尊重吖。
李泽星：我宁愿发达!
(体育场)
(班学生打紧排球)
李泽星：好波!
同学：杀佢呀!
同学：扣杀呀!
虫虫：小心啲呀。
(李泽星画咗一个心，攞嚟同虫虫调情)
虫虫：咦——
李泽星：望咩呀?未见过人耍花枪呀?
*虫虫：我妻!
李泽星：我个心!我个心!
(富田头马戙喺李泽星面前)
李泽星：僆仔!想嚟踢波呀?呢个场我睇嘅，畀咗利市未呀?
(富田头马开枪)
李泽星：又系你?
富田头马：我大佬收到风你重未死!重要要过美国指证佢。闹咗我一大餐!今次一定要怼冧你!
(富田头马同啲僆落败而逃)
富田头马：唔好杀我呀，超人!
李泽星：我做到超人都系全靠你之嘛。
富田头马：(普通话)谢谢!
李泽星：(普通话)不客气!不客气!
富田头马：做咩呀?
李泽星：打篮球呀!
富田头马：吓?打篮?
(李泽星将富田头马塞入篮框)
虫虫：佢点呀?佢系咪真系死咗呀?
李泽星：差唔多啦，重差啲嘅。
虫虫：点解会噉架?我好惊呀。
李泽星：惊咩啫?有我喺度吖嘛。
虫虫：噉如果你唔喺度呢?
李泽星：噉我哋永远喺埋一齐啰。
虫虫：好呀!好呀!好呀!
学生(拍掌)：好呀!……
虫虫：唔好呀!唔好呀!唔好呀!
李泽星：算啦，其实我都系讲吓架咋。
虫虫(发围，揸住李泽星衣襟)：喂!你讲咩呀?讲过唔算数?跟我嚟!
(富田屋企)
孙佳君(开门，开灯，见到富田坐喺sofa度)：乜系你呀?你保释咗出嚟咩?
富田：估唔到哩?
孙佳君：Honey，噉就真系好嘞。系哩，听讲你派咗阿Mark去香港㖞。点呀?
富田：衰咗喇。
孙佳君：唔系哗?
富田：佢背脊骨断咗七截，呢世都唔喐得架嘞。不过我有六千万。
孙佳君：六千万?
富田：我已经将阿Mark改变成全世界最强嘅人造人。同埋我输入咗杀人嘅百科全书同埋战争百科全书入咗佢嘅电脑里便。我睇个香港仔点死!(大笑兼拧头)
(李泽星婚礼)
(阿达喊)
姜司教授：你做咩喊呀?
阿达：就噉就畀咗个仔你，唔喊有鬼呀。
姜司教授：你个仔死剩把口咋㖞，其他嘢冚棒唥都系我嘅㖞。
阿达：死剩把口都沟到你侄女呀，你吹得佢涨咩?
李泽星(揽实光头仔)：多谢你!
李泽星：阿爸!
阿达：阿仔!
李泽星(同教授扼手)：教授!
姜司教授：恭喜!恭喜!
李泽星：多谢晒!
阿达：喂!话时话喇，你嗰兜花洒掂唔掂架?
李泽星：花洒甩咗喇。哈，唔知点解佢而家生返一兜八爪鱼出嚟。
阿达：八爪鱼?!
侍应生：随便啦!
王小虎：星哥!
李泽星：小虎!
王小虎：恭喜博士!恭喜世伯!(同李泽星拥抱)星哥你今日大好日子，我真开心呀!
李泽星：我整蛊咗你几呀年你都重未死，我更开心啦。
王小虎：多谢晒你呀!如果唔系得你，我都唔会纹眉到家吓都咁靓仔呀。
(李泽星发现唔对路)
李泽星：大家唔该行后啲，借借唔该吓。
王小虎：影幅相先。
李泽星：阿小虎已经冇纹眉好耐嘞。
王小虎：系咩?
两下子：系。
(王小虎现出原形，原来系阿Mark)
李泽星：快啲走!
阿Mark：今晚呢度全部人都要死!
李泽星：虫虫!
”虫虫“：我好惊呀!
李泽星：唔使惊!定啲嚟!唔使惊!(中枪)
阿Mark：Fire!
(“李泽星”开门入房)
姜司教授(品酒)：(普通话)一级棒!
“李泽星”：咪埋嚟呀!
姜司教授：哎，乜你中咗枪呀?好彩你系人造人，打唔中个头冇事架啦。
“李泽星”：唔好诈诈谛谛呀你呀。
姜司教授：你唔系连我都唔认得吓哗?
“李泽星”：答我问题先。我第一次上你堂左手边第一行第八个位系男系女系人系鬼?叫咩名?
姜司教授(惊惶失措)：咁多学生，我点知呀!
“李泽星”：我数三声，答唔出就一刀劏落去。一!二!三!
姜司教授：咪系你啰!
“李泽星”：啱咗。
(阿达屙完出嚟)
阿达：喂!冇嘢吖嘛，阿星?
“李泽星”：唔好诈诈谛谛呀。我问你个问题先。我第一次上佢堂左手便第一行……
(姜司教授通水)
阿达：咪你啰。
“李泽星”：你听到我问佢。
阿达：冤枉呀，我边有听到吖。
“李泽星”：我一刀劏落去架。
虫虫(企喺门口)：我系真架，你问我问题吖。
“李泽星”(举刀劈落)：我问你老母!
姜司教授：刀下留人呀!
阿达：搞清楚先。
“李泽星”：放手!
李泽星：见唔见我老婆呀?
“李泽星”(现原形)：玩到最开心嘅时候你硬系嚟叉镬我嘅?!
李泽星：快啲走!快啲走!我警告你呀，最憎人扮我架。
(畀追踪导弹击中)
阿达：星!
虫虫：星!
姜司教授：星呀!
姜司教授：唔好埋去呀!
虫虫：星!
富田：你呢个二打六嘅机械人边度够我呢个叻呀?
众人：啊?!
富田：咩嚟架?
虫虫：咩嚟架，阿叔?
姜司教授：我知嘞!佢遇强愈强嘅复仇系统已经启动。佢将会变成超级市场里便最恐怖嘅武器。
阿达：唔系避孕袋啩?
富田：傻嘅!就算系卫生巾都唔怕你啦。
(李泽星变成咗黄老太)
众人：啊!!!
富田：唔系啩?
众人：黄老太?
富田：喐佢!喐佢!(撇)
(阿Mark开枪射黄老太，但系冇乜用，黄老太有宝衣护体。)
黄老太：黄老太金蝉宝衣!
黄老太(“叉”阿Mark)：你唔合格!
(黄老太畀阿Mark踢上天)
(黄老太变成熨斗，将阿Mark压扁咗)
众人：Yeah!
(阿Mark恢复原形)
(阿Mark将黄老太踢入货柜里便，然之后自己冲埋入去)
阿Mark：咦?!唔见人嘅?
李泽星：你企咗喺我肚里便喇，死佬!
阿Mark：你个八婆变咗个微波炉?
姜司教授：射唔出哩?呢个超级微波炉钻石都照熔呀!Yeah! 边个话家庭用品冇用架?
姜司教授：得架喇。
李泽星：未得!你估牛扒呀?话晒机械人嗱，焅多阵添啦。
(阿Mark收皮)
姜司教授：好嘢!成功喇!成功喇!
阿达：好嘢呀!(见到仇人)光头佬!
富田：啲人呢?去咗边呀?
阿达：耷佢!(猛耷光头佬)
富田：唔好呀!
虫虫：你点呀?你冇嘢吖嘛?
李泽星：条粉肠熔咗哽住个胃，家吓有啲滞。
虫虫：你而家系男定系女呀?我嫁唔嫁你好呀?
众人(四围走)：八爪鱼呀!
李泽星：唔使惊呀!重喺度!我飞返靓个发就可以继续结婚。虫虫!
姜司教授(拍李泽星膊头)：呢位即系黄老太嘞吓嘛?
李泽星：咩呀，博士?
姜司教授：冇嘢!我想约你行街睇戏晒月光噉啫。唔知你意思点呢?
李泽星：傻咗咩，博士你?不过可以考虑吓同你行街先嘅。
*虫虫：
姜司教授：Yeah!
(剧终)