看百变星君剧本学粤语
导语：《百变星君》是由叶伟民导演，周星驰，梁咏琪，吴孟达等主演的奇幻科幻喜剧片，下面YJBYS小编分享《百变星君》粤语剧本，可以帮助大家学习粤语哦。
(闹钟响，阿达起身开工)
阿达(撞亲个头)：哎吖!死嘞!死嘞!够钟!开工!开工!开工!
阿达(同只奶牛打招呼)：早晨呀，Ivy!嗱?走吓哗?出嚟!出嚟畀我揸!朝朝都系噉揸你咋嘛，出嚟呀!(踢奶牛)出嚟喇嘛!
阿达(揸牛奶)：啊，Ivy你真系抵惜嘅，揸极都有!第日我娶个老婆系噉呢就唔慌饿死咯。
阿达(托住杯奶上楼畀李泽星饮)：大少!鲜奶!
(李泽星攞啲牛奶嚟啷口)
阿达：换过张床单佢!啊唔系，成张掉咗佢，听日买张新床。
仆人：Yes, Sir!
(李泽星行去走廊，纵身跳入楼下嘅游泳池)
鬼妹：Hey, take a morning bath!
鬼妹2：Wash your hair, OK?
李泽星：今日轮到边个洗脚呀?
鬼妹：Me.
李泽星：叫你洗脚咋，唔好洗第二度呀。
(李泽星喺几个鬼妹簇拥之下行出屋企)
李泽星：一齐讲我靓唔靓仔?
一众鬼妹：好靓仔!
阿达(追上李泽星)：大少!大少呀!老爷打电话返嚟，佢话过两日返嚟探你㖞。
李泽星：叫佢攞多一百万美金过嚟!
阿达：够唔够呀?
李泽星：噉你讲多啲啦!
阿达：啊!系!爹啲呀!我好乖呀，我好挂住你呀!我而家返学喇!快啲攞二百完返嚟畀我。
(李泽星踩空)
阿达：对唔住!对唔住!
李泽星：我堂梯去咗边呀?
阿达(踎低身)：喺处!
(阿达同李泽星上咗直升飞机返学)
阿达：食雪糕呀!绿色衬返件衫呀!
李泽星：黑色一粒粒咩嚟架?
阿达：朱古力!
李泽星：绿衬黄吖嘛。绿衬黑嘅咩?(抌咗雪糕)
阿达：对唔住!
鬼妹：One two. Look at my shoes. Three four, knock at the door. Fix six, pick up sticks. Nine ten……(见到李泽星架飞机，四窜)
李泽星：我都话咗个黑柴着间条架喇。
阿达：系吖。
李泽星(见到王小虎)：王小虎㖞。
阿达：系吖，我认得佢屎窟呀!
李泽星：截住佢。
(李泽星同阿达跳飞机)
李泽星(拍王小虎膊头)：走得去边啫?
王小虎：星哥，我咪企喺度等你啰。
李泽星：上次唔好意思呀，我烧晒你成身啲毛，搞到你要纹眉同埋戴假发，我都好后悔。
王小虎：算啦!我成家人都打你老窦工。况且我而家都好有型吖。
李泽星：你个冚家铲又的确系眉清目秀。呢下真系吹你唔涨架，真系。嚟，整粒朱古力先。
王小虎：星哥，我真系受唔起呀。呢啲泻药我食得少咩?
李泽星：哗吓，你醒目成噉样样?噉冇计喇，走喇!(转身)
阿达：大少，就噉就算喇?
李泽星：冇办法架啦，你睇佢个样咁醒目，玩佢唔起架而家。
(王小虎见到地下有二百文美金，嗱嗱声执起入袋)
李泽星：咦喂，我唔见咗两嚿水㖞。会唔会畀人偷咗呢?
王小虎：噉报警逐个搜身喇，啲冧巴我抄低晒架喇。
(王小虎嗱嗱声吞咗两张银纸，又一次中计)
李泽星：醒目仔!张银纸好唔好味呀?都系泻药做架。入口即溶，五秒见效。
(王小虎想用手指勾返两张银纸，为时已晚，嗱嗱声走入厕所)
阿达(扐出遥控器)：中计嘞啩?
李泽星：Hold it! Hold it! 等佢屙到一半先。
李泽星：爆!(王小虎暴殄天物)弹!(王小虎连带个马桶畀弹上天)
李泽星(揸住望远镜狂笑)：哈哈哈!
钢牙妹：你知唔知噉整人好危险架?
阿达：喂，僆仔你边瓣架?你大佬系边个呀?
钢牙妹：我阿叔系呢个嘅姜司教授。我喺度读书架。
李泽星：我吩咐过猪兜唔准入嚟读架㖞。
阿达：噉咪系，我都系洗咗黑钱至行得入呢间学校咋。
李泽星：你猪成噉洗黑钱都唔得啦，走啦!
阿达：走呀!
李泽星：走呀!
阿达：走呀!
钢牙妹：人渣!
李泽星：惨得过我靓仔?
钢牙妹：你亦唔靓仔!
李泽星：咩话?
钢牙妹：你亦唔靓仔!
李泽星：你讲咩?你噉嘅大话都讲得出?你对唔对得住你自己良心?
阿达：算啦!
李泽星：对唔对得住你父母?
阿达：唔好同佢嘈啦!
李泽星：你对唔对得住呢个国家?你快啲开记者招待会澄清呀!如果唔系我煎你嘅皮，拆你嘅骨，饮你嘅血!
(姜司教授上堂)
姜司教授：人体系世界上最奇妙嘅嘢。而我嘅课程呢就系人体学里便最尖端嘅课程。就系话人体嘅模仿性同埋适应性。就好似变色龙晓用保护色去模仿四周围嘅颜色。而人类亦都同样有噉样嘅功能。
阿达：大少，请!
李泽星：睥咩呀?有书你就讲!Get out!(坐低)
姜司教授：或者我举个例吖。比如话，两公婆，佢哋相处得耐咗。佢哋个样就会慢慢变得相似。人哋话呢啲系夫妻相。其实呢，就系人体内嘅因子互相模仿。(乌低身问李泽星)呢位同学有咩意见噉呢?
李泽星：阿Sir，我成日对住啲女，又唔见我变咗啲女?
姜司教授(继续讲课)：人体系非常之脆弱嘅。我相信总有一日，我哋嘅身体大部分将会畀人造器官所代替。到时候，只系留返个脑。人体器官将会被电脑控制。佢有好强嘅模仿能力，可以变任何嘅人，甚至任何嘅物件。
李泽星(拧头)：唔知可唔可以变支雪茄呢?
姜司教授：理论上系可以嘅。呢位同学好似对呢个问题好有兴趣噉噃。
李泽星：其实系对你有兴趣。正话有件四眼钢牙话我听你系佢阿叔。我专登嚟睇吓你有咩咁把炮。
姜司教授：我而家开始解剖，如果你可以望住多过三分钟嘅，先至再讲其他嘢。
姜司教授：我而家开始解剖尸体嘞!
(姜司教授开始解剖尸体)
同学甲：What's he doing?
同学乙：He's really crazy!
姜司教授：果然有胆识呀吓。喺我嘅解剖堂，你系唯一一个可以企咁耐嘅。
*李泽星：超!我未有使舍过你呀真系!
姜司教授：如果你真系敢擘大对眼睇一次嘅话，我就话你把炮。
(李泽星晕)
(食堂)
李泽星：畀佢吓吓只脚又会软成噉嘅真系!
阿达：我头先攋咗尿，失陪一阵。
李泽星(坐低)：脚软哩，钢牙?
钢牙：你好叻呀?够胆食咗碟肉酱意粉佢!
(李泽星想呕)
李泽星(弹起身)：我老窦系校董，我转头叫佢炒你阿叔鱿鱼。再赶你出校，卖你落吧跳脱衣舞!睺你跳跳吓嗰阵，再炒你鱿鱼!
姜司教授(食紧面)：冇人可以炒到我嘅。我系美国政府聘用嘅高级科学顾问。嚟呢度，只系做客席教授。
李泽星：炒你唔到就攞去炆，炆完再炸都重得呀!
姜司教授：估唔到你就系全校最令人讨厌同作呕嘅二世祖。果然闻名不如见面。
李泽星：你讲咩呀?我老窦系校董呀!
姜司教授：如果你老窦唔系校董嘅话，你一早就畀人打死咗嘞!
李泽星：Shut up!
姜司教授：你够胆就话畀人知你老窦唔系校董，你睇吓情形会系点?
李泽星：我话你听吖，我老窦唔系校董，又如何呀?
(姜司教授同钢牙妹支箭噉标出去)
(李泽星畀人狂殴)
(李泽星半夜潜入姜司教授实验室)
姜司教授：个仆街累我畀人打镬金嘅。呢个仇我一定要喺今晚报!
阿达：系吖!系吖!
李泽星：左便!左便!
阿达：右便!右便!
李泽星：唔系!哎吖!哗!你小心啲啦!家吓棍撞棍嘞!
阿达：对唔住呀大少，有冇撞瘀到呀?攞樽油同你捽几下。
李泽星：死开啦你!快啲过嗰便上楼梯摷吓。
阿达：大少，冇理由上楼梯架㖞。实验室多数喺地牢嚟架。咦，呢度似喇。(开门)大少，真系呢度呀。
李泽星：哗吓，咁大个地牢呀?有排玩喇!摆喺嗰度先。
阿达：哗，你话踩到呢个捕兽器呀，唔死都残废呀!
李泽星：你去边呀?
*阿达：冇，我惊佢踩唔中呀，摆啲蕉皮喺处帮帮佢吖嘛。
李泽星：哎吖，好计吖。
阿达：多谢!搞掂!
李泽星：喂，呢啲喉同我拆晒佢!每条屙涿尿落去里便。
阿达：好呀。(屙尿，见到一只手经过)大少大少，正话我见到有只手喺嗰度飙过呀。
李泽星：屙尿啦你。
阿达：真架!呃亲你保佑我冇仔送终。
李泽星：睇你个样梗冇仔送终啦。就算有都系畸形架啫!
阿达：噉又未必。
阿达(用支电筒喺度照吓照吓，身后窜出一对眼)：睥咩呀，僆仔?(突然醒觉)啊!大少大少!我啱啱见到有对眼呢，乜都冇净系得对眼。凌空噉睥住我㖞。
李泽星：凌空睥?
阿达：凌空睥!
李泽星：噉你想我点啫?
阿达：冇，我就想请教吓，遇到噉嘅情况应该点样做?
李泽星：嗱，畀着我呢，我就一嘢插爆佢双眼。你使唔使睩大只眼，等我示范一次畀你睇冇?
阿达：唔使，唔使。
(对眼又蒲头)
李泽星：吆!咩嚟架?做咩呀?咦，佢睥咩呀?系咪就系“凌空睥”呀?
阿达：就系“凌空睥”啰。
李泽星：插佢!
阿达：死喇!
李泽星：见点呀你?
*阿达：
李泽星：做咩啫?
阿达：唔知呀，咩嚟架?
李泽星：等我嚟处理!
阿达：呢下唔得。细力啲，细力啲得架喇。
李泽星：走?唔好走!差人，企喺度!重捉你唔到?出嚟!我叫你出嚟呀!细路你匿喺度做咩呀?攞个身份证睇吓。
半人：冇带!
阿达：
李泽星：啊!——(夺路而走)救命呀!——
(阿达自食其果)
阿达：等埋我呀!救命呀!——
(钢牙妹屋企)
警员：Check it.
钢牙妹：Don't believe them. They are crazy. They are really crazy.
警员：OK,OK! Don't worry. We'll handle it. Calm down.
(地牢)
探长：李生，我哋揾咗大半个钟头呀，都揾唔到你讲嗰只识行嘅手板，重有识及嘢嘅眼，都冇出现过呀。
李泽星：混账!我工人啱啱畀只怪手差啲通柜。
阿达：咩差啲呀?直情通咗两吋，通咗两吋呀!
李泽星：前后四吋。
阿达：前后四吋。
姜司教授：我呢个学生就最有想像力架嘞。咪由得佢玩多阵啰。
李泽星：教授!我思疑你系一个极度心理变态者。更加相信你杀害咗一百几十个无辜嘅人，将佢哋嘅手手脚脚斩落嚟进行残酷嘅科学实验。
姜司教授：你真系有侦探嘅头脑。但系你奈我咩何?你揾到啲手手脚脚先讲啦!
(李泽星转眼见到一只手)
(李泽星揾个锤仔扑落去，原来系阿达只手)
李泽星：撞鬼你咩?摆只手喺度扬吓扬吓。
阿达：我见头先只手咁咸湿，一定系公嚟架。所以特登扮只乸谂住引佢出嚟噉解之嘛。
李泽星(指挥探长做嘢)：嗱!你而家派两个人过嗰便睇睇，我同两个人上便及及，阿达你过去嗰便攞指模。
探长：我至系探长呀，你唔好再喺度扮探长呀!(推开李泽星)
李泽星：嗱，我老窦呢就系……(李泽星畀几个人“ung2”出实验室)
阿达：大少!
姜司教授：拜拜!行得开嘅，听朝返嚟上堂啦!
(阿达喺出便侦察)
(阿达返去)
(阿达开门)
(阿达畀扑咗个头)
阿达：做乜打我㖞大少?
李泽星(一身棒球员打扮)：叫咗你敲三长两短暗号架嘛。
阿达：出便冇人架嘛。
李泽星：嗰个姜司教授杀人狂魔嚟架。我识穿咗佢，佢一定谂办法嚟杀死我架嘛。唔系我使鬼叫你请六条茂尼嚟保护我咩?重有呀，我叫你请保镖咋，唔系请model呀。而家佢哋叉起条腰个死款，边有运行架?
阿达：佢哋净系识叉起条腰架咋。
李泽星：咩呀?
阿达：啊，(睇表)讲起够钟添。收工!
六盲人：Yes, Sir!
李泽星：咩意思呀?
阿达：盲架嘛。大少，成个夏威夷都冇人愿打你工。唯有喺盲人学院请呢扎茂尼嚟顶住档啰。所以咪……
李泽星：如果我数到三重见到你，我就噬落去。三!(扑阿达个头)
阿达(执起顶帽)：点解佢唔数二嘅?(撞到黄一飞)啊，老爷!
黄一飞：我要畀个爆棚惊喜佢。
(黄一飞畀扑咗一镬)
李泽星：爹啲!
黄一飞：仔呀!
李泽星：妈咪!
朱咪咪：仔呀!好硬正呀你!
李泽星：你冇嘢吖嘛你?
黄一飞：哦，我冇事，邵爵士个气功师傅教咗我上乘嘅气功吖嘛。所以你一扑落去呢，支棍子挛咗，我冇事架。嗱，而家就喉咙又唔通啦，又冇呕血啦。个肺又好舒服啦。净系黐咗线之嘛。
李泽星：系?
黄一飞：系!唔信我拉开链畀你睇吓。我啲总掣线黐埋咗架嘛而家。
朱咪咪：啋!撞鬼你咩?
黄一飞：你唔好搞我呀，而家秦始皇打到嚟呀!你快啲顶住，我要救世人呀!
阿达：我去睇睇佢吖。
(门钟响)
李泽星：敌人到呀，准备!
李泽星：我开门引开佢注意力。你兜去后便噍佢!
阿达：呣!
孙佳君：Hi!
(李泽星睇到晕晒浪)
(李泽星扑晕阿达)
李泽星：小姐你冇嘢吖嘛?
孙佳君：冇嘢呀，呢个咩人嚟架?
李泽星：唔知㖞!系贼嚟啩。小姐你有咩吩咐呢?
孙佳君：我叫Bonnie呀。我住响对面屋嘅。我屋企个冲凉缸坏咗。
李泽星：唔系啩?
孙佳君：唔知可唔可以借个地方冲吓凉呢?
(游泳池边)
李泽星：我通常都喺呢度冲凉嘅。洗头水，护发素，随便拣。重有只鲍鱼刷喺水底。
孙佳君：唔错呀。话时话吖，你换衫都换得几快㖞。
李泽星：其实我剥人啲衫重快呀。
孙佳君：唔信!
李泽星：哗，噉叫跳水呀?我凄!(揸起一对胸罩)边个嘅呢?
朱咪咪：我架!
李泽星：喂!大佬呀!你唔怕畀人笑都因住啲狗会吠吖大佬!(跳落水)
朱咪咪：喂喂喂!你老窦晕咗呀!
李泽星：再殴多佢两棍醒返架嘞!
朱咪咪：你去睇吓佢啦!
李泽星(同孙佳君讲)：跳水咁叻，等我帮你擦吓背先。
孙佳君：喂，呢支嘢好似洗厕所架㖞。
李泽星：啱吖，而家洗厕所啦而家咪。
孙佳君：耶!好衰架你!
朱咪咪：你就嚟连你老窦姓咩你都唔记得架你!
李泽星：话时话真系唔记得咗㖞!咦，阿婶，你都好面善㖞。揾边位呀你?
朱咪咪：我生嚿叉烧好过生你呀!
李泽星：生我系副作用啫，享受制造过程之嘛你!
朱咪咪：噉又系。
李泽星：凉就就嚟冲完喇!跟住去边度wet好呢?
孙佳君：去wet?我冇谂过㖞。不过如果有人同我洗吓脚趾呢，我或者会有灵感嘅。
(酒吧)
李泽星：咩嚟架?
孙佳君：Mental illness drop.
李泽星：即系咩呀?
孙佳君：忽得呀!Yeah!
李泽星：Yeah!(猛抠自己嘅口)
孙佳君：喂!做咩呀你?想吐返出嚟呀?
李泽星：系吖，我想睇清楚个牌子，再买返一百几呀粒看吓门口之嘛。
孙佳君：唔使啦，我你度大把，嚟吖。(将成几十粒忽得灌入李泽星嘅口中)
李泽星：Yeah!
侍应生：Good evening, what can I serve you?
孙佳君：Seven Tequila.
李泽星：即系Tequila加Seven-up
孙佳君：No! Seven Tequila. 一人七杯吖!
李泽星：Yeah!
(孙佳君同李泽星一齐饮酒)
(李泽星将成杯酒泼喺孙佳君面上)
李泽星：你当我傻架，八婆?
主持人：Ladies and gentlemen. Now it's the time you've all been waiting for. The world's most famous twist contest!(众人鼓掌)Yeah! First, let's see who our champous will be tonight. The winner will receive a mystery prize.
孙佳君：不如我哋去跳舞吖。
李泽星：跳舞我唔识架㖞。
孙佳君：如果你赢咗嘅，我今晚陪你瞓吖。
李泽星：Bonnie，我谂你睇错人。我并唔系一个贪图女色嘅人。Understand?
孙佳君(惊惶失措)：喂喂喂!揽住我吖。
李泽星：唔好咁心急得架。
孙佳君：我老公嚟咗呀。
李泽星：有噉嘅事?
孙佳君：你拧转头睇吓吖。行紧去吧嗰便呀。
李泽星：哗!乜你十几个老公架?
孙佳君：唔系吖，系我老公同佢啲保镖呀。
李泽星：你老公开保安公司嘅咩?
孙佳君：唔系吖!佢系搞组织架。
李泽星：系?民主党定共和党呀?
孙佳君：山口组呀。
李泽星：Yeah! 拜拜!(想松人，好衰唔衰畀个主持人捉住只手，呢次冇死咯)
主持人：I know how's the result. The winners are Mr. Lee Chak Sing and his lovely lady.
(李泽星想走)
主持人：Wait, give the lady a kiss, give the lady a kiss!
(富田愤而起身)
富田头马：二五仔嚟咗呀。
(公路)
孙佳君：好衰架你!要人揸车自己又唔揸。你做咩唔出声啫?你瞓着咗呀?啊?你做咩成口白泡架?喂喂!你点呀?喂!喂!喂!你唔好晕呀!喂!(摆低李泽星喺地下度)喂!你点呀?(手忙脚乱)唔系!唔系!喺边呀?(喺柜桶度攞出一支超大嘅针)是但啦!
孙佳君：系吖!佢真系OD呀。我有晒架撑架，你快啲过嚟救佢啦。我求吓你吖!
电话另一头：嚟到佢都死啦!你自己搞掂佢啦!你又唔系第一次。
孙佳君：厾人我唔掂架。我畀人厾先至得架咋嘛。
电话另一头：你唔识都要识架嘞!唔系死喺你屋企重大镬呀!嗱，我而家去揾本说明书教你，你等我一阵呀。
电话另一头：喂喂!唛咗位未呀?
孙佳君：唛咗喇!
电话另一头：佢系服食过度毒品，引致心脏衰竭，动脉萎缩，预防反常膨胀。要同佢进行动脉注射，刺激心脏。噉先有得救架。
孙佳君：唔好啦!
电话另一头：你点都要搏吓架嘞。攞咗针未呀?
孙佳君：攞咗喇。
电话另一头：唔好理咁多，一嘢拮落去喇!
(李泽星剧痛，将孙佳君撞晕咗)
电话另一头：喂喂!
李泽星(扐起电话)：喂!
电话另一头：你醒返喇?
李泽星：我醒返喇!条女晕咗咋。
电话另一头：吓?噉支针插咗去边度呀?
*李泽星：插咗喺我裤浪对上左手便。
电话另一头：十个男人九个摆左边架㖞。你呢?
李泽星：我好彩呀，啱啱第十个，摆右边嘅。
电话另一头：噉恭喜你㖞。但系我袋摆左边呀。
李泽星：冇嘢嘞!拜拜!
(出便)
画外音：唔关我事架，唔关我事架，唔好呀!No!
富田(扚起一个人)：你个仆街!我畀咁多钱你，叫你喺政府嘅电脑度改少少嘢。你厾我背脊?
手下：Boss, don't kill me! Don't kill me. Don't kill me.
富田头马(擦鞋)：大佬，呢轮你啲广东话真系好掂。
富田：呢轮同我条女讲得多。自不然就掂架喇。搞掂埋你先。
手下：Don't kill me! Don't kill me. Don't kill me.
富田：你叫我唔杀你，就唔杀你?我点做大佬呀?
手下：畀个机会我呀。畀个机会我呀。
富田：好!我就畀个机会你。等你死都死得眼闭。等个衰婆同个奸夫返嚟，齐齐攞去大海，喂鱼!(开枪)
(李泽星择路而逃)
富田：Get him!
(李泽星开跑车逃走)
富田：Shit! Fuck! 冚家铲!
富田头马：What is “冚家铲”?
(HAWAII DIAMOND HEAD POLICE STATION)
探长：你搞乜嘢呀?寻日又话姜教授屋企有手有脚会行会走!今日就话有人要杀你。Get out! 你走呀!
李泽星：……
(李泽星慌慌失跑返屋企)
(朱咪咪拍佢膊头)
李泽星：阿妈，阿妈，好大镬，好大镬，好大镬。
朱咪咪：好大镬呀我!
李泽星：你听我讲吖!
朱咪咪：咦!你听我讲啦!
李泽星：我畀人揸枪啡呀。
朱咪咪：啡都唔算大镬呀!我有嘢同你讲呀!
李泽星：你有咩新嘢讲呀?来来去去叫我畀心机读书。我一留都系架啦。
唔系吖!我今次有新嘢讲呀!你老窦李一飞其实唔系你亲身老窦嚟架。
李泽星：我知呀，厕所达先系吖嘛。
朱咪咪：啊?!你点知架?
李泽星(掩面)：我今日扑傻咗老窦啫，我冇扑你吖，你发咩神经啫，喺度?
李一飞：傻?!(行雷闪电)扑湿我个头，以为我傻咗乜都唔知。佢两个奸夫淫妇，将过去嘅丑事扬晒出嚟。我先至知道你唔系我嘅仔!(又一次行雷闪电)
李一飞：我都知道事有跷蹊。我嘅绰号系台山汤告鲁斯，男中嘅极品。但系，生个仔好似坺屎噉。
李泽星(摆手)：我完全唔知你哋噏咩，总之我要二百万。边个畀二百万我，我就认边个做老窦。
阿达(手揸二百文纸)：二百文我有。
李泽星：二百万!喂!你返入去洗厕所啦!
阿达(追溯往事)：二十五年前，有一晚，我喺柴房睇紧咸书，你阿妈光脱脱噉冲入嚟熄咗眼灯。
朱咪咪：喂喂喂!你唔好乱讲呀!嗰晚我有着袜架。
阿达：对唔住，我记错。你当日着住一对白袜仔。老爷嗰晚唔喺屋企。我一时控制唔到就同你阿妈……。开返灯之后，我好后悔。
*李泽星：所以话你睇咸书你话有咩谓呢?但系你好收声喇，你唔好再噏喇!
朱咪咪：喂喂喂!唔好呀!仔打老窦会畀雷劈架。
李泽星：边个话佢系我老窦?你话系就系呀?有咩证明呀?
哎吖，粤语残片话斋，老窦跪仔，个仔会晕架。
李泽星：吓哗?你跪低睇吓我会唔会晕?跪吖!
(阿达跪低，李泽星头晕)
朱咪咪：嗱，嗱，嗱，系咪呢?晕喇!晕喇!
李泽星：我乜事都冇呀!死未?(同阿达咬耳仔)你唔好喺度搞搞震吖嗱，我重有大好前途架。
李一飞：喂!呢度有张二百万嘅支票，如果你认我做老窦嘅呢，我前事不计重陆续有嚟。如果唔系嘅呢，你知道会点架啦!
(李泽星收下二百万支票)
李泽星：多谢阿爸!
(李一飞抱住李泽星)
李一飞：系!噉先至系吖嘛乖仔。嗱，正所谓识时务者为俊杰吖嘛。
朱咪咪：你噉即系大逆不道呀!唔好呀!
(李泽星赶阿达扯)
李泽星：Get out!
阿达：唔认我唔紧要。
李泽星：躝啦!
阿达：自细到大我都纵容你，其实系害咗你。
李泽星：小心讲嘢吖嗱，我报警拉你呀。
阿达：我老实同你讲，你系一个极度令人讨厌令人作呕嘅人。
李泽星：讲吖!
阿达：我希望你以后识得点样尊重人，人哋先会尊重返你。(李泽星兜咗阿达一脚)
(李泽星开门，将阿达踢出门)
李泽星：走啦契弟!
阿达：你就契弟!生得你出有权话你!“yang3”我都够胆死!
(教堂)
四眼钢牙：喂!禀神嗱?
李泽星：你唔惊我嘅咩?
四眼钢牙：我惊你有牙呀?我够有钢牙咯。你唔开心咩?
李泽星：我见到你有乜法子开心啫?
四眼钢牙：噉我走嘞㖞。
李泽星：快啲吖唔该。(四眼钢牙掉头走)
李泽星：喂!过嚟!(四眼钢牙坐喺李泽星身边)我有个朋友呀，佢为咗钱唔认自己亲身老窦。
四眼钢牙：噉点呀?
李泽星：冇咩，系噉啫。
四眼钢牙：噉走先嘞。
李泽星：喂喂喂!佢重赶咗个老窦出门口，兼且伸咗佢一脚。当其时行紧雷落紧雨。你觉得佢个人点?
四眼钢牙：禽兽都不如啰。
李泽星：但系佢好靓仔架㖞。
四眼钢牙：哦。噉都好啲。唔系就要拉去打靶架嘞。
李泽星：讲开先讲吖嗱，你觉得我又靓仔成点?
四眼钢牙：我虫虫向天发誓，你一啲都唔靓仔哩。
富田头马：今晚成屋得返佢一个人咋。
李泽星(一身棒球员打扮)：仆街吖!
富田头马：Move it!
李泽星：真系嚟呀。
富田头马：你系咪想打911报警?
李泽星：得唔得呀?
富田头马：随便。
李泽星：911几号电话话?
(黑鬼一枪都射唔中李泽星)
黑鬼：Sorry!
(李泽星跳落楼)
(阿达将啲灯全部熄灭)
富田头马：边个熄灯?
富田头马：咪走呀!
甲：做咩成碌木噉企喺度呀?
乙：我点知佢会撞过嚟㖞。
富田头马：追佢呀!呢间屋太大嘞，炸咗佢先。
(光头佬开晒啲灯，得意之际畀李泽星扑咗一棍)
李泽星：我妻!
阿达：重有!
李泽星：Yeah!
阿达：Yeah!(扑多一棍)
李泽星：话时话你返嚟做咩啫?
阿达：我根本冇走过。
李泽星：唔好喐!攞支枪过嚟!只手唔好乱喐呀!慢慢递过嚟。快啲!咪谂埋晒啲衰嘢呀!只眼鬼鬼鼠鼠以为戴副超我睇你唔到呀嗱?你唔好制呀你!(攞到支枪)我叫你攞支枪过嚟吖!
富田头马：你咪攞咗啰。
李泽星：哦。OK.(用枪顶住富田头马个头)咪喐!
黑鬼：咪喐呀!你朋友喺我手上!
李泽星：我叫你咪喐呀!你大佬喺我手上呀!
黑鬼：你咪乱嚟呀，我哋交换人质。
李泽星：换你老母!即刻放返我朋友，如果唔系我一枪就打爆佢个死人头!
黑鬼：OK! OK!
(阿达跪低，李泽星晕低)
李泽星：你跪喺度做咩啫?
阿达：我个仔嚟架，受唔起呀。一跪佢就会晕架嘞。
富田头马：Hello! Goodbye!
(计时炸弹好快就嚟爆)
李泽星：呢条蠢人，有枪唔用，佢系要用炸弹。呢镬佢百密一疏嘞。
阿达：留低把刀㖞。
李泽星：重记唔记得我哋个弹弓厕所呀?
阿达：弹阿王小虎嗰个?
李泽星：就喺你隔篱咋。
阿达：哦?个厕所一次可以弹几多人上去架?
李泽星：一个。
阿达(睇吓个计时炸弹)：啊，唔惊!重有个几钟头，弹完一个，咪又一个啰。
李泽星：配返个眼镜啦!剩返十秒咋。
阿达：把刀斩唔断条链架。你斩断我只手自己走啦!
李泽星：呢啲嘢唔使你教吖!(斩断自己只手)我成世未对你好过。呢镬补返数啦!阿爸!
阿达：阿仔!
李泽星：坐低啦!(揿遥控器，阿达畀炸到九霄云外)
(钢牙妹畀一个闪电吓醒)
钢牙妹：啊!
姜司教授(喺出便敲门)：虫虫，你冇事吖嘛?
钢牙妹：我冇事呀。
姜司教授(入嚟)：你发恶梦呀?
钢牙妹：系呀!我见到李泽星畀人炸到粉身碎骨。好得人惊呀!
姜司教授：你平时咪好憎佢嘅?点解发梦都会梦见佢架?
钢牙妹：噉我又真系几憎佢架。
姜司教授：我记得嘞!有个心理学家话呢，最吸引女人嘅就系嗰啲衰男人嘞!
钢牙妹：耶!其实佢都唔系咁衰架咋。佢今日都识得去教堂嗰度忏悔。佢衰硬颈咋!惊我笑佢。佢几可怜架，一个朋友都冇。
姜司教授：其实呢，佢系个聪明仔嚟架。如果唔系，点可以谂到咁多桥嚟整蛊人啫?
(电话响)
姜司教授(拎起电话)：Yes.
电话另一头：Doctor Chang please.
姜司教授：Speaking.
电话另一头：有个病人叫李泽星，佢畀人炸到粉身碎骨呀。请你快啲返嚟医院吖。
钢牙妹：做咩事呀，阿叔?
姜司教授：哎吖，原来你唔系发梦呀，系真架。
(医院)
阿达：教授!教授!我个仔点呀?
姜司教授：你冷静啲，喺一般嘅医学角度嚟讲，你个仔已经死咗。
阿达：吓?
姜司教授：但系对于我嚟讲，佢只系死咗一半。
阿达：噉即系点呀?
(姜司教授揭开个盖，阿达见到个仔剩返个嘴)
李泽星：阿爸，系咪你嚟咗呀?
阿达：啊?做乜净系得个嘴架?
姜司教授：系吖。
李泽星：教授冇话你知咩?我周身散晒，死剩个脑同把口咋。
姜司教授：哎，你唞唞先。
阿达：唔好讲嘢喇。
姜司教授：我讲一个好消息同一个坏消息畀你知。
阿达：咩呀?
姜司教授：好消息呢就系我同你提过啲人造器官嘅?美国政府已经发明咗嘞。佢哋可以保留两样嘢，而其他呢，全部用人造器官代替。可以帮你个仔砌返一模一样。
阿达：噉快啲砌吖，快啲砌吖。
姜司教授(引荐)：呢位昆西医生，就系呢度嘅主诊医生。
阿达(同昆西医生扼手)：昆西医生吓哗?你好!你好!呢个系我个仔嚟嘅，唔该你帮帮手救救佢条命吖。唔该!
姜司教授：听我讲埋先，重有个坏消息。要畀六千万美金佢，先至肯做手术架。
阿达：对唔住呀，我冇咁多钱。
姜司教授：冇钱冇得倾架!
阿达：唔怕!我打畀佢个便宜老窦。(讲电话)我明白架嘞，老爷。你自己同佢讲吖。
李一飞：阿星，钱我大把。但系唔准你再见厕所达。如果唔系我同你脱离父子关系。最多以后得闲饮茶算数。
李泽星：其实我呢几日已经谂得好清楚架嘞李生。我哋得闲饮茶算喇!
李一飞：好，既然你死性不改呀，你以后自生自灭喇!
阿达：点解你咁蠢啫?
昆西医生：Oh Jesus, you're wasting my time. I can't believe it.(行开)
姜司教授：乜咁现实架?真系一啲人情味都冇。
阿达：六千万我冇呀仔，六千文或者有。
姜司教授：哎，你真系有六千文?好，我蚀底啲杀咗你。贵有贵做，平有平做嘅啫。够唔够胆搏一搏呀?
(姜司教授嘅实验室)
(姜司教授喺度努力工作)
姜司教授：抹汗!(阿达同姜司教授抹汗)搞掂!
阿达：辛苦晒!辛苦晒!
姜司教授：趁热食咗佢呀。
阿达：好呀!好呀!
姜司教授：我煮嘅牛肉面，包你食到舐舐脷呀!
阿达：个衰仔黑口黑面，都系畀佢食先嘞!嚟呀，乖仔，嗱，碗面你食先嘞!